Starfsmannafélag LÍÚ, SLÍÚ, undirbýr nú fjöldameiðyrðamál.
„Við þurfum bara að fá einhvern vitleysing eða þingmann til að segja að við séum á launaskrá hér og þá erum við komin með 'keis', eins og þeir segja í Ameríkunni,“ segir talsmaður félagsins glaðhlakkalegur.
Hann sér fram á „ísí monní fyrir félagið“ í ljósi dóms sem féll í Héraði í dag gegn Þór Saari, þar sem þingmaðurinn smái en knái var dæmdur til að greiða miskabætur vegna ummæla sinna um meintan launþega LÍÚ.
„Okkur reiknast til að miskabæturnar muni samkvæmt þessu ná að fleyta okkur öllum til Kanarí yfir jólin. Vúhú!“
Hringberi
óskast til að bera máttarbaug inn í land öflugs myrkradróttins. Þarf að vera 18 ára eða eldri. Má ekki reykja.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.