Uppgjafa Jedi-riddari á sextugsaldri hefur viðurkennt að hafa beint svokölluðum dauðageisla að farþegaflugvél í aðflugi til Akureyraflugvallar fyrr í vikunni.
Segir hann þetta hafa verið gert „í einhverju flippi“, en hann var ásamt félögum sínum að halda upp á stórafmæli ónefnds stórmúffa í nýja Helstirninu sem verið er að byggja yfir Eyjafirðinum.
Hefur maðurinn beðist afsökunar og heitið því að nota geislann ekki meira en nauðsyn krefur.
Óvissuferð
Æðisleg og æsispennandi óvissuþrenna: Ekvador, Venezúela og Kolumbía. Upplifðu dásemdir Suður-Ameríku! Rauðvín, fögur fljóð og kókaín eins og þú getur í þig látið!
- Lúdóferðir
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.