Félagarnir Gísli Teitsson og Gunnsteinn Hjálmtýsson, sem deila saman íbúð í Grafarholtinu hafa verið kærðir af nágrannakonu sinni fyrir 'ósæmilega hegðun og óþolandi hávaðamengun'. Ástæðan er að sögn Svövu Waage, sem býr á hæðinni fyrir neðan þá kumpána, "..viðurstyggilegar frygðarstunur og klámfengnar upphrópanir jafnt um daga sem nætur." Og hún bætir við: "..ef þessir menn geta ekki hamið sig í ástarleikjum þá verða þeir að fara í eitthvað annað umhverfi, þar sem ekki eru börn og hjartveikt fólk."
Gísli telur freklega vegið að sambandi þeirra Gunnsteins, sem sé "..einvörðungu viðskiptalegs eðlis" og að auki tímabundið, "..eða þar til Gussi finnur sér íbúð."
Auglýsendur!
Að gefnu tilefni skal minnt á að ekki er tekið við auglýsingum á vefinn nema frá fyrirtækjum sem sannanlega eru í eigu Baggalúts-samsteypunnar eða tengdra aðila.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.