Leó Berndsen, Reykjavíkurmeistari í tölvumyllu, keppir um helgina á auðveldasta móti heims.
Mótið fer fram á hótel Guapo del Mare í spænska smábænum Torremolinos og þykir sem fyrr segir það auðveldasta sinnar tegundar.
Þátttakendur eru tveir; fyrrnefndur Leó Berndsen og norski hálfbjáninn Trond Eskefjell. Trond þessi er eini maðurinn sem vitað er til að hafi mælst með eins stafs greindarvísitölu - töluna sjö.
Mikill þyngdarmunur er á þeim Leó og Trond. Leó er 51 kg og Trond er 234 kg. Það ætti þó ekki að koma að sök.
Einkamál
síamstvíburar á fimmtugsaldri óska eftir að komast í kynni við eldri karlmann. Með nánari kynni í huga. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.