Bára Jónmundardóttir, ekkja, gekk í dag frá kaupum á öllu kjöti, lýsi, spiki og innmat af þeim tveimur langreyðum sem Hvalur 9 hefur þegar veitt auk þess sem hún gaf vilyrði fyrir kaupum á allt að 10 hvölum að auki yrði hún ánægð með þessa tvo.
Leysir þetta vanda Hvals hf. því mikil óvissa var um það hvort yfirleitt tækist að selja þá hvali sem ætlunin er að veiða hér við land.
Bára vildi lítið við fjölmiðla tala eftir að gengið var frá kaupunum, sagði bara að sér þætti hvalur „fjári góður á bragðið“ og að það kæmi fólki „andskotann ekkert við“ hvað hún og „helvítis kötturinn“ [Vernharður, 10 vetra, gulbröndóttur] ætu.
Viltu slaka á eftir erfiðan dag í bankanum?
Líttu við og slakaðu á í góðra vina hópi. Alltaf heitt á könnunni. Athugið að almenningur er ekki velkominn.
Stjórnarráðið – sælureitur í alfaraleið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.