Lovísa Rögnvaldz, ritari og Sigvaldi Arinbjarnarson, smiður, eru skilin. Í tilkynningu frá upplýsingafulltrúa þeirra segir að þau hafi „einfaldlega vaxið í sundur“. Þó eru getgátur uppi um að Sigvaldi hafi átt í leynilegu ástarsambandi við meinatækni á fertugsaldri. Hvorki hann né Lovísa vildi þó staðfesta að svo væri þegar Baggalútur náði tali af þeim í morgun. Það er því ljóst að hjónabandi sem hófst með „brúðkaupi aldarinnar“ í Neskirkju 12. mars1981 er lokið.
Búast má við að Herra Níels, 11 ára síamsköttur þeirra Lovísu og Sigvalda, muni búa hjá þeim til skiptis - skv. samningi þeirra á milli um sameiginlega forsjá. Ekki er á þessu stigi vitað um eignaskipti, en teljast verður líklegt að íbúð þeirra í Dalalandi verði seld og Lovísa haldi eftir bifreið þeirra af gerðinni Toyota Carina árgerð 1998 gegn því að Sigvaldi fái bæði tjaldvagninn og gasgrillið.
Nærgætin
stúlka óskast á gott heimili í Vesturbænum. Þarf að hafa reynslu af umönnun og umhirðu urðarkatta.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.