Þá skortir ekki hugrekkið félagana Birki Birgisson og Einar Einvarðsson en þeir hyggjast endurvekja hina vinsælu hljómsveit the Beatles - með nýjum mannskap.
„Já, það er algjör synd að þessi hljómsveit skuli ekki vera starfandi ennþá. Þeir eiga fullt af góðum lögum og gætu verið að gera góða hluti á böllum og svona. Það vantar bara nýtt blóð í samstarfið, ef þú spyrð mig,“ sagði Birkir og kveðst vera búinn að setja sig í samband við báða eftirlifandi meðlimi sveitarinnar.
„Jájá, auðvitað buðum við þeim að vera með. Þessi Paul svaraði reyndar ekki SMS-inu frá mér, bölvaður dóninn - en hann um það. Einar er hvort eð er fínn bassaleikari. Trommarinn var hins vegar til í að vera með - og ég veit að pabba dauðlangar að spila á sólógítar. Þá er ekkert að vanbúnaði að byrja að æfa bara - og semja nýtt efni.“
Apar
Litlir apar, stórir apar, allskonar apar. Margar stærðir. Margir litir. Henta vel við létt þjónustu- og þingstörf. Reykja ekki.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.