Sjö af hverjum tíu handrukkurum þjást af lágu sjálfsmati og kulnun í starfi að sögn Elmars Vernharðssonar forstjóra eins stærsta handrukkunarfyrirtækis Skandinavíu Intro Barbaria, sem nýverið hóf starfsemi hérlendis. Hann segir stefna í óefni í innheimtugeiranum verði ekki gripið til aðgerða gegn "neikvæðri og oft á tíðum óréttlátri umfjöllun um starfsstéttina".
"Við sem störfum í þessu neikvæða umhverfi þurfum oft að brynja okkur gegn þeim stöðugu fordómum sem dynja á okkur alla daga, fólk skilur ekki hvernig þetta getur farið með brothættar sálir sem oft á tíðum sinna slíkum störfum", sagði Elmar í spjalli við Baggalút, og hann bætti við: "Yfirleitt eru þetta einstæðingar og hálfgerðir utangarðsmenn sem sinna þessum einmanalegu og vanþakklátu störfum og ég skora á stjórnvöld - einkum félagsmálaráðuneyti og Vinnumálastofnun að láta til sín taka á þessum vettvangi áður en stórskaði hlýst af... það væri t.d. leiðinlegt ef félagsmálaráðuneytið brynni til ösku fyrir tilviljun eða forstjóri vinnumálastofnunar fingurbrotnaði - tíu sinnum".
Vonbiðlar athugið
Biðilsbuxurnar sívinsælu komnar! Margir litir.
Fataverzlunin Popplín - Hafnarfirði
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.