Bogi Gústavsson, snyrtifræðingur, lætur jafnan lítið yfir sér - en ef ásakanir alþjóðalögreglunnar Interpol reynast réttar er hann einn bíræfnasti svikahrappur sögunnar.
Bogi var handtekinn í gær og gefið að sök að hafa ítrekað villt á sér heimildir, bæði hér heima en þó sérstaklega á erlendri grund. Aðferð hans var djöfullega einföld - hann dulbjó sig sem þekkt andlit úr skemmtanabransanum og stofnaði til ástarsambands við sterkefnaða, heimsþekkta aðila af hinu kyninu.
Meðal þeirra hlutverka sem Bogi hefur brugðið sér í á allra síðustu árum má nefna Gwyneth Paltrow, Jennifer Lopez og Mel B. Skiljanlega náðist ekki í þá félaga Chris Martin og Ben Affleck vegna málsins, en Fjölnir Þorgeirsson, stjarna, vildi koma því á framfæri að tíminn með Boga hafi verið yndislegur og sig hefði aldrei grunað neitt.
Einkamál
Eldri, atvinnulaus, einstæð, drykkfelld kona í Grindavík óskar eftir að kynnast sjúklega myndarlegum karlmanni á fertugsaldri sem veit ekki aura sinna tal - með náinn vinskap (kynlíf o.fl.) í huga.
A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.