Eftir ríflega 10 ára þrotlausa rannsóknavinnu og óteljandi tilraunir, flestar á eigin líkama, tókst Böðvari Hlynssyni, baðverði, að segulmagna líkama sinn nægilega til að málmhlutir hreinlega svífi að honum og festist við hann.
"..þetta er tiltölulega einfaldur mekanismi," sagði Böðvar hróðugur "..ég bara 'hleð mig' með því að drekka ákveðna blöndu af hálfýrðri askrobínsýru og nudda líkaman með sérstöku geli, sem reyndar er meira til að deyfa sársauka ef ég verð fyrir óvenju oddhvössum eða þungum hlutum."
Aðspurður segist Böðvar ekki endanlega hafa áttað sig á gagnsemi þessarar uppfinningar, né heldur hafi hann náð að losna við ýmsar aukaverkanir. "..stundum kviknar segulsviðið meðan ég sef, sem getur verið mjög bagalegt ef mikið af litlum málmhlutum eru nálægir - einnig á ég það til að sogast að stærri málmhlutum s.s. bílum og hurðum - en þá er bara að bíða rólegur þangað til efnið fer úr líkamanum."
Bleik ský
Lítið notuð bleik ský til sölu. Svífa 5–10 metra, halda 100 kg.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.