Rannsóknarblaðamaður hjá Fréttablaðinu hefur komið upp um afar viðamikið samsæri, sem hefur að hans sögn viðgengist áratugum saman og teygir anga sína víða.
Skv. heimildum blaðamannsins hafa saklaus börn einkum orðið fyrir barðinu á samsærinu en einnig einfaldar sálir sem gjarnan eru skotmörk óprútinna svikahrappa. Blaðamaðurinn fullyrðir m.a. að hinn kunni trúbador, Eiríkur Fjalar, sé í raun fasteignasalinn Þórhallur Sigurðsson. Einnig hefur hann traustar heimildir fyrir því að Tóti trúður sé enginn annar en Ketill Larsen, myndlistarmaður og Hemmi Gunn sé Hermann Gunnarsson, veitingamaður.
Munum eftir bankamönnunum
Nú er hart í ári hjá litlu bankamönnunum, sem eru vanir sífeldu góðæri síðan þeir klöktust út úr háskóla. Við mælum með að þeim sé gefið bankabygg, sem má nálgast í kjörbúðum.
Bankamannavinafélagið
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.