Stjórn enska knattspyrnuliðsins Liverpool hefur ákveðið að senda einn leikmanna sinna, John Arne Riise í fitusog. Að sögn knattspyrnustjóra liðsins, Gerard Houllier, er margbúið að biðja hann að vera ekki að fara úr skyrtu sinni í hvert sinn sem hann skorar mark. "Knattspyrna er skemmtun fyrir alla fjölskylduna, og líkami John Arne er bara ekki boðlegur".
Norðmaðurinn knái hefur alla tíð verið grannur og spengilegur, en að sögn félaga hans í Liverpool lenti hann í slæmum félagsskap í vetur. "Hann mætir seint á æfingar og er sí-étandi sælgæti og drekkur orðið bara gos", var haft eftir Sámi Hyppia, fyrirliða liðsins, í breskum fjölmiðlum í dag.
Ekki náðist í Riise vegna málsins en hann var í matarboði hjá félaga sínum Eiði Smára Guðjohnsen.
Tapað fundið
Hvítt og móbrúnt lamadýr týndist einhversstaðar milli Hveragerðis og Eyrarbakka um helgina. Svarar nafninu Hermann. Fundarlaun. Skilvís finnandi hafi samband við afgreiðslu Baggalúts.
Ég sé að fullháttvirtur forseti hins háa Alþingis er með eitthvað bakkaklór eftir ömurðarveisluna sem hann hélt á Völlunum að viðstöddu fámenni í gær.
„Forseti Alþingis harmar að heimsókn danska þingforsetans hafi verið notuð til að varpa skugga á hátíðarhöldin og leyfir sér að trúa því að það sé minnihlutasjónarmið að viðeigandi sé að sýna danska þingforsetanum óvirðingu þegar hann sækir okkur heim og kemur fram fyrir hönd danska Þjóðþingsins og dönsku þjóðarinnar.“ — segir forseti.
Ég mótmæli herra forseti.
Þessi vanhugsaða og alls óvelkomna heimsókn var hreint ekki „notuð“ til að varpa skugga á fjölmilljónapartíið þitt. Heiðursgesturinn flóttalegi sá alveg sjálfur um að varpa sínum skoðanamyrka skugga á hátíðahöldin og eyðileggja þau gersamlega.
Það eru miklu fremur Danir sem sýna okkur óvirðingu með því að senda þessa útdönkuðu rasistapíu hingað — og skömmin er þeirra að púkka upp á hana sem þingforseta yfirhöfuð.
Það er nefnilega míkróminnihlutasjónarmið að halda að það sé í lagi að dubba upp rauðklædda rasista og leiða til hásætis á hátíðarþingfundi á sjálfu Lögbergi. Og það að gera lítið úr gagnrýni á þetta skipulagsslys er ekkert annað ómerkilegt yfirklór og eftirámjálm.
Svo eiga menn bara að drullufrussfretast til að biðjast afsökunar á klúðrinu í stað þess að barma sér undan eðlilegum viðbrögðum við þessum skammarlega undirlægju– og druslugunguhætti.
Góðar stundir.