Knattspyrnulið Liverpoolborgar sigraði nú um helgina hið ógnvænlega lið Manchester United í úrslitaleiknum um enska deildarbikarinn í knattspyrnu. Manchesterliðið - þjónar óbermisins Fergusons, undir forystu hins illa Keane - reyndi hvað eftir annað að vinna á Liverpoolliðinu en án árangurs. Maður leiksins var markvörður Liverpool, Pólverjinn Jerzy Dudek, sem hvað eftir annað hætti eigin lífi og limum fyrir málstaðinn og þegar upp var staðið höfðu synir Liverpool skorað tvö mörk en óþokkarnir ekkert.
Athugið!
Dönsku síðbuxurnar komnar. - Hafrannsóknastofnunin
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.