Alþingi tók á dögunum í gagnið nýja tegund lygamælis, til notkunar við yfirheyrslur á gestum Alþingishússins. Mælirinn beitir hugsanalestri og gerir notandanum þannig ljósar skoðanir fólks á hinum ýmsu málum.
"Þetta er stórsniðugt tæki," sagði Valgerður Sverrisdóttir iðnaðarráðherra. "Með þessu móti getum við vinsað út óæskilega gesti frá þeim fjölda sem sækir Alþingispallana þessa dagana, að ég tali nú ekki um þingmenn!"
Forsætisráðherra kveðst fagna þessu tæki, enda muni það, ásamt nýja rafmagnsstólnum, gera stjórnvöldum auðveldara í framtíðinni að halda uppi aga í herbúðunum.
Dreki.
Nývanaður, 3ja alda dreki fæst gefins á gott heimili. Gegnir nafninu Filipus. A.v.á.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.