Lögreglan í Reykjavík réðist til inngöngu í spilavíti í kjallara bakhúss við Suðurgötu um helgina. Hún handtók þar bíræfna fjárhættuspilara sem sumir hverjir voru með þúsundir króna meðferðis. Einnig gerði hún upptækt nokkurt magn af tóbaki og tvo kassa af bjór. Eru þetta umsvifamestu aðgerðir lögreglu af þessu tagi frá upphafi skipulagðrar löggæslu á Íslandi.
Borgarstjórar
Undirbúningsnámskeiðin eru að hefjast! Aðeins tæplega 50 sæti laus - síðasti séns ef þú ætlar að ná að setjast í stólinn á þessu kjörtímaibili.
Það er sérlega ánægjulegt að taka við viðurkenningu fyrir hönd Baggalúts fyrir framúrskarandi rekstur samsteypunnar, og þar með hluti af þeim 2% fyrirtækja sem geta státað af slíkum árangri. Ljóst er að yfirgnæfandi hluti íslensks atvinnulífs er í tómu tjóni og órafjarri frá því að vera framúrskarandi á nokkurn hátt. Mættu þau taka Baggalút og önnur almennileg fyrirtæki sér til fyrirmyndar og hysja upp um sig rekstrarbrækurnar.
Það eru tíu lykilatriði atriði sem hafa komið Baggalúti á þennan eftirsóknarverða stað, sem rétt er að deila með áhugasömum:
- Ekkert starfsfólk
- Engin viðvera
- Ekkert húsnæði
- Engin þjónusta
- Engin gildi
- Engin frí
- Engin áhætta
- Ekkert internetsamband
- Enginn samningsvilji
- Engin kaffivél
Beri önnur fyrirtæki gæfu til að fylgja fordæmi okkar er ljóst að íslenskur fyrirtækjamarkaður yrði skjótt heilbrigðari og næði undraskjótt að skipa sér í fremstu röð í heiminum. En til þess er lítil von, meðan íslenskir stjórnendur eru upp til hópa óhæfar, ákvarðanafælnar gungur með allan sinn rekstur á bólakafi uppi í bakraufinni á sér.
Góðar stundir.